“Jajapóke tetã pyahu"

   Tema: Educación. Edición 127

Ohaívaekue mbo´ehára Juan Ramón González P.

Iporãngo avei ñamañami, jajesareko ha ñahesa'yijo tekombo'e guive opa mba'e oikóva ñane retãme ha ohejáva techapyrã mitã, mitãrusu ha karia'ype oīva ha oñehekombo'éva mbo'ehaópe.

Ñahendu ha jahecha opa jaikohárupi, ñemonda, japu, jejuka, popinda, ñembotuicha ha ambu'e. Ko'ã mba'e vaieta hasy, ha ojuka opa kera'yvoty heñóiva mbo'ehára ha túva apytu'üme.

Mba'éichapa tendotakuéra hováta ojerure hagua tekopotī maymáva tetãguãme, jahecháramõ hína hikuéi voi ombohape heta mba'e vaieta. Iporãiteva'erã Paraguái membyicha ñañopytyvõ ha ñaime peteī ñe'ēme, ikatuhaguáicha ñambo'yke moñái vaieta oīva ñane retãpyme ha hetaite árama ombokusuguéva ñane remiandu.

He'íngo karai Ministro Educación pegua, Eduardo Petta, hembiapo oguerutaha, tekopotī, aranduve ha tekoporã. Che mbo'eháraháicha ajeroviase umi iñe'ēre, che upéva avei aipota tekombo'épe guarã.

Arandu ha tekombo'éngo ogueruva'erã maymáva rekovépe py'aguapy ha tekosasõ. Heta ñande retãygua oiko gueteri tekosasō'yre tavy rupive. Oguahéma ára ñambo'ykévo ko'ã mba'e ha ñamboguata tetã pyahu oñemomba'éva opa ambu'e retãme.

Tendota pyahu Mario Abdo Benítez, imandu'akuri estadística ñane retãmegua rehe, ohechaukaha ta'anga ñande rekoháre. He'i Kuri, topa temimbo'égui oñepyrūva oñehekombo'e , opytaha irundy tapeku'áre ha nomohu'ãiva imbo'epy mbo'ehaópe.

Nahiãvéima japyta ñe'ēmente ñane retãme, japáy ha jajesarekova'erã opa mba'e oikóvare, oiméramo jahayhu añete ñane retã, jajepytasókena hese.

Chembopy'a rory ahecháramo kuimba'e ha kuña osēva guataháre ha ombosapukáiva mba'e vai ha opa tendota kuérape ombohypa ha omboperõva ñane retã.

Anike ñambo'yke ñande kera'yvoty, ñañehekombo'éke ha ñaipytyvõ ñande rembiasápe, ikatu haguáicha jaiko Paraguáipe, py'aguapy ha tekojojápe he'iháicha ñande poyvi pytã, morotī, hovy.

Upéicha avei, aníke ñambo'yke ñande mba'eteéva, upéva apytépe jaguereko hína hetaite mba'e porã ombojeguakáva ho omo'ambu'éva ñande rekove. Peteī mba'e tuicháva ha'e hína ñane ñe'ēkõi.

Ñande retãgua heta mba'e oguereko omomaranduva'erã ha umíva ojapokuaáva'erã ñe'ē guaraní ha castellanope. Tajahupytyke po'a ha jaiko vy'ápe ñane retãme.